Һавадан күзәтү вакытында 173 закон бозу ачыкланды
Табигать саклау законнарының үтәлешен тикшерү максатыннан Татарстанның Алабуга, Мамадыш, Тукай, Бөгелмә, Әлмәт, Чирмешән, Норлат, Әлки районнары территорияләре вертолеттан күзәтелде. Күзәтүдә Татарстан экология һәм табигый байлыклар министры урынбасары – табигать саклау буенча баш дәүләт инспекторы Фаяз Шакиров, Кама буе, Көньяк-көнчыгыш һәм Идел-Кама территориаль идарәләре башлыклары катнашты. Нәтиҗәдә 173 рөхсәтсез җитештерү һәм куллану калдыклары өеме ачыкланды.
Территориаль идарә башлыкларына җир кишәрлекләренең ияләрен ачыклау һәм чүплекләрне бетерүне беркетмәләү бурычы йөкләнде. Һавадан күзәтү йомгаклары буенча Министрлык инспекторлары административ йогынты чаралары күрәчәк. Бозулар турында белешмәләр чара күрү өчен югарыда әйтелгән муниципаль берәмлекләрнең башлыкларына җибәрелде.
Министрлыкның матбугат хезмәте